....:::Shair O Shaery:::....

[ajtr]

bahut pahale se un qadamo.n kii aahaaT jaan lete hai.n
Firaq Gorakhpuri

bahut pahale se un qadamo.n kii aahaaT jaan lete hai.n
tujhe ai zi.ndagii ham duur se pahachaan lete hai.n

merii nazare.n bhii aise qaatilo.n kaa jaan-o-imaa.N hai
nigaahe.n milate hii jo jaan aur imaan lete hai.n

tabiyat apanii ghabaraatii hai jab sun-saan raato.n me.n
ham aise me.n terii yaado.n kii chaadar taan lete hai.n

Khud apanaa faisalaa bhii ishq me.n kafii nahii.n hotaa
use bhii kaise kar guzare.n jo dil me.n Thaan lete hai.n

jise suurat bataate hai.n pataa detii hai siirat kaa
ibaarat dekh kar jis tarahaa maanii jaan lete hai.n

tujhe ghaaTaa na hone de.nge kaarobaar-e-ulfat me.n
ham apane sar teraa ai dost har ehasaan lete hai.n

hamaarii har nazar tujhase nayii sauga.ndh khaatii hai
to terii har nazar se ham nayaa paiGaam lete hai.n

'Firaq' aksar badal kar bhes milataa hai ko_ii qaafir
kabhii ham jaan lete hai.n kabhii pahachaan lete hai.n

 

[ajtr]

chhalak ke kam na ho aisii ko_ii sharaab nahii.n
Firaq Gorakhpuri

chhalak ke kam na ho aisii ko_ii sharaab nahii.n
nigaah-e-nargis-e-r'anaa teraa javaab nahii.n

zamiin jaag rahii hai ki inqalaab hai kal
vo raat hai ko_ii zarraa bhii mahv-e-Khvaab nahii.n

zamii.n us kii falak us kaa qaayanaat us kii
kuchh aisaa ishq teraa Khaanamaa_Kharaab nahii.n

jo tere dard se maharuum hai yahaa.N un ko
Gam-e-jahaa.N bhii sunaa hai ki dastayaab nahii.n

abhii kuchh aur ho insaan kaa lahuu paanii
abhii hayaat ke chehare pe aab-o-taab nahii.n

dikhaa to detii hai behatar hayaat ke sapane
Kharaab ho ke bhii ye zindagii Kharaab nahii.n

---------- Post added at 12:13 AM ---------- Previous post was at 12:12 AM ----------

Gair kyaa jaaniye kyo.n mujhako buraa kahate hai.n
Firaq Gorakhpuri

Gair kyaa jaaniye kyo.n mujhako buraa kahate hai.n
aap kahate hai.n jo aisaa to bajaa kahate hai.n

vaaqa_ii tere is a.ndaaz ko kyaa kahate hai.n
na vafaa kahate hai.n jis ko na jafaa kahate hai.n

ho ji.nhe.n shaq vo kare.n aur Khudaao.n kii talaash
ham to i.nsaan ko duniyaa kaa Khudaa kahate hai.n

terii suurat nazar aa_ii terii suurat se alag
husn ko ahal-e-nazar husn-numaa kahate hai.n

shikavaa-e-hijr kare.n kis dil se
ham Khud apane ko bhii apane se judaa kahate hai.n

terii rudaad-e-sitam kaa hai bayaa.N naa-mumkin
faayadaa kyaa hai magar yuu.N zaraa kahate hai.n

log jo kuchh bhii kahe.n terii sitam-koshii ko
ham to in baato.n ko achchhaa na buraa kahate hai.n

auro.n kaa tajurbaa jo kuchh ho magar ham to "Firaq"
talKhii-e-ziist ko jiine kaa mazaa kahate hai.n

 

[ajtr]

jab nazar aap kii ho ga_ii hai
Firaq Gorakhpuri

jab nazar aap kii ho ga_ii hai
zi.ndagii zi.ndagii ho ga_ii hai

baarahaa bar-Khilaaf-e-har-ummiid
dostii dushmanii ho ga_ii hai

[baarahaa=everytime]
[bar-Khilaaf-e-har ummiid=contrary to every expectation]

hai vo takamiil purakaariyo.n kii
jo merii saadagii ho ga_ii hai

[takamiil=completion; purakaarii=slyness/cunning]

terii har pursish-o-meharbaanii
ab merii bekasii ho ga_ii hai

[pursish-e-meharbaanii=hospitality and benevolence]
[bekasii=despair/helplessness]

bhuul baiThaa hai tuu kah ke jo baat
vo merii zi.ndagii ho ga_ii hai

bazm me.n aa.Nkh uThaane kii taqasiir
ai "Firaq" aaj bhii ho ga_ii hai

[taqasiir=mistake]

 

[ajtr]

kabhii paabandiyo.n se chhuuT ke bhii dam ghuTane lagataa hai
Firaq Gorakhpuri

kabhii paabandiyo.n se chhuuT ke bhii dam ghuTane lagataa hai
dar-o-diivaar ho jin me.n vahii zi.ndaa.N nahii.n hotaa

hamaaraa ye tajurbaa ki Khush honaa muhabbat me.n
kabhii mushkil nahii.n hotaa, kabhii aasaa.N nahii.n hotaa

bajaa hai zabt bhii lekin muhabbat me.n kabhii ro le
dabaane ke liye har dard o naadaa.N nahii.n hotaa

yaqii.n laaye.N to kyaa laaye.N jo shak laaye.N to kyaa laaye.N
ki baato.n se trii sach-jhuuTh kaa imkaa.N nahii.n hotaa

---------- Post added at 12:17 AM ---------- Previous post was at 12:16 AM ----------

ko_ii na_ii zamii.n ho nayaa aasamaa.N bhii ho
Firaq Gorakhpuri

ko_ii na_ii zamii.n ho nayaa aasamaa.N bhii ho
ai dil ab us ke paas chale.n vo jahaa.N bhii ho

afsurdagii-e-ishq me.n soz-e-nihaa.N bhii ho
yaanii bujhe dilo.n se kuchh uThataa dhuaa.N bhii ho

[afsurdagii-e-ishq = disappointents in love]
[soz-e-nihaa.N = hidden sorrow]

is darjaa iKhtilaat aur itanii muGaayarat
tuu mere aur apane kabhii daramiyaa.N bhii ho

[darjaa = level/amount (of); iKhtilaat = closeness]
muGaayarat = aloofness; daramiyaa.N = in between]

ham apane Gam_gusaar-e-muhabbat na ho sake
tum to hamaare haal pe kuchh mehar_baa.N bhii ho

[Gam_gusaar = sympathizer]

bazm-e-tasavurrat me.n ai dost yaad aa
is mahafil-e-nishaat me.n Gam kaa samaa.N bhii ho

[bazm-e-tasavvuraat = gathering of thoughts/imagination]
[mahafil-e-nishaat = happy gathering]

mahabuub vo ki sar se qadam tak Khuluus ho
aashiq vahii ki husn se kuchh bad_gumaa.N bhii ho

[Khuluus = love/sweetness]

---------- Post added at 12:18 AM ---------- Previous post was at 12:17 AM ----------

kuchh ishaare the jinhe.n duniyaa samajh baiThe the ham
Firaq Gorakhpuri

kuchh ishaare the jinhe.n duniyaa samajh baiThe the ham
us nigaah-e-aashanaa ko kyaa samajh baiThe the ham

raftaa raftaa Gair apanii hii nazar me.n ho gaye
vaah rii Gaflat tujhe apanaa samajh baiThe the ham

hosh kii taufiiq bhii kab ahal-e-dil ko ho sakii
ishq me.n apane ko diivaanaa samajh baiThe the ham

beniyaazii ko terii paayaa saraasar soz-o-dard
tujh ko ik duniyaa se begaanaa samajh baiThe the ham

bhuul baiThii vo nigaah-e-naaz ahad-e-dostii
us ko bhii apanii tabiiyat kaa samajh baiThe the ham

husn ko ik husn kii samajhe nahii.n aur ai 'Firaq'
mehar_baa.N naamehar_baa.N kyaa kyaa samajh baiThe the ham

---------- Post added at 12:18 AM ---------- Previous post was at 12:18 AM ----------

maut ik giit raat gaatii thii
Firaq Gorakhpuri

maut ik giit raat gaatii thii
zindagii jhuum-jhuum jaatii thii

kabhii diivaane ro bhii pa.Date the
kabhii terii bhii yaad aatii thii

kis ke maatam me.n chaa.Nd taaro.n se
raat bazm-e-azaa sajaatii thii

[bazm-e-azaa=a wake (gathering of mourners)]

rote jaate the tere hijr nasiib
raat furqat kii Dhalatii jaatii thii

[furqat=separation]

kho_ii kho_ii sii rahatii thii vo aa.Nkh
dil kaa har bhed paa bhii jaatii thii

zikr thaa ra.ng-o-buu kaa au' dil me.n
terii tasviir utaratii jaatii thii

husn me.n thii in aa.Nsuuo.n kii chamak
zindagii jin me.n muskuraatii thii

dard-e-hastii chamak uThaa jis me.n
vo ham ahal-e-vafaa kii chhaatii thii

tere un aa.Nsuuo.n kii yaad aa_ii
zindagii jin me.n muskuraatii thii

thaa sukuut-e-fazaa tarannum-rez
buu-e-gesuu-e-yaar gaatii thii

Gam-e-jaanaa.N ho yaa.N Gam-e-dauraa.N
lau sii kuchh dil me.n jhil-milaatii thii

zindagii ko vafaa kii raaho.n me.n
maut Khud raushanii dikhaatii thii

baat kyaa thii ki dekhate hii tujhe
ulfat-e-ziist bhuul jaatii thii

the na afalaak gosh bar aavaaz
beKhudii daastaa.N sunaatii thii

karavaTe.n le ufaq pe jaise subah
ko_ii doshizaa ras-masaatii thii

zindagii zindagii ko vaqt-e-safar
kaaravaa.N-kaaravaa.N chhupaatii thii

saamane tere jaise ko_ii baat
yaad aa-aa ke bhuul jaatii thii

vo teraa Gam ho yaa Gam-e-duniyaa
shamma-sii dil me.n jhil-milaatii thii

Gam kii vo daastaan-e-niim-shabii
aasmaano.n koo nii.nd aatii thii

maut bhii gosh bhar sadaa thii "Firaq"
zi.ndagii ko_ii giit gaatii thii

---------- Post added at 12:19 AM ---------- Previous post was at 12:18 AM ----------

mujhako maaraa hai har ek dard-o-davaa se pahale
Firaq Gorakhpuri

mujhako maaraa hai har ek dard-o-davaa se pahale
dii sazaa ishq ne har jurm-o-Khataa se pahale

aatish-e-ishq bha.Dakatii hai havaa se pahale
ho.NTh jalate hai.n muhabbat me.n duaa se pahale

ab kamii kyaa hai tere be-sar-o-saamaano.n ko
kuchh na thaa terii qasam, tark-o-fanaa se pahale

ishq-e-bebaak ko daave the bahut Khalavat me.n
kho diyaa saaraa bharam sharm-o-hayaa se pahale

maut ke naam se Darate the ham, ai shauq-e-hayaat
tuune to maar hii Daalaa thaa qazaa se pahale

ham u.nhe.n paake "Firaq" aur bhii kuchh khoye gaye
ye takalluf to na the ahad-e-vafaa se pahale

 

[S.U.R.B.]

Tujhe Mujh Se, Mujh Ko Tujh Se, Jo Bohot Hi Pyaar Hota
Na Tujhe Qaraar Hota, Na Mujhe Qaraar Hota

Tera Har Marz Ulajhta, Meri Jaan-E-Na’tawan Se
Jo Tujhe Zukaam Hota To Mujhe Bukhaar Hota

Jo Mai Tujh Ko Yaad Karta, Tujhe Cheenkna Bhi Parta
Mere Sath Bhi Yaqeenan Yahi Baar Baar Hota

Kisi Chawk Mai Lagate Koi Chooriyun Ka Khokhaa
Tere Shehr Mai Bhi Apna, Koi Kaarobaar Hota

Gham-o-Ranj Aashiqaana, Nahi Calculatoraana
Usse Mai Shumaar Karta, Jo Na Be-Shumaar Hota

Wahan Zair-E-Behs Aate, Khad-O-Khal-O-Khuye Khoobaan
Gham-E-Ishq Par Jo Anwer, Koi Seminar Hota


_____________________________ Anwar Masood.

 

[ajtr]

na jaanaa aaj tak kyaa shai Khushii hai
Firaq Gorakhpuri

na jaanaa aaj tak kyaa shai Khushii hai
hamaarii zindagii bhii zindagii hai

[shai = thing/object]

tere Gam se shikaayat-sii rahii hai
mujhe sach-much ba.Dii sharmindagii hai

mohabbat me.n kabhii sochaa hai yuu.N bhii
ki tujh se dostii yaa dushamanii hai

ko_ii dam kaa huu.N mehamaa.N muu.Nh na phero
abhii aa.Nkho.n me.n kuchh kuchh roshanii hai

[ko_ii = some/few more (kuchh)]

zamaanaa zulm mujh par kar rahaa hai
tum aisaa kar sako to baat bhii hai

jhalak maasuumiyo.n me.n shoKhiyo.n kii
bahut rangiin terii saadagii hai

ise sun lo sabab is kaa na puuchho
mujhe tum se mohabbat ho ga_ii hai

[sabab = reason]

sunaa hai ik nagar hai aa.Nsuo.n kaa
usii kaa dusaraa naam aa.Nkh bhii hai

vahii terii mohabbat kii kahaanii
jo kuchh bhuulii hu_ii kuchh yaad bhii hai

tumhaaraa zikr aayaa ittefaaqan
na biga.Do baat par baat aa ga_ii hai

---------- Post added at 12:19 AM ---------- Previous post was at 12:19 AM ----------

na jaane ashk se aa.Nkho.n me.n kyo.n hai aaye hue
Firaq Gorakhpuri

na jaane ashk se aa.Nkho.n me.n kyo.n hai aaye hue
guzar gayaa zamaanaa tujhe bhulaaye hue

jo manzile.n hai.n to bas raharavaan-e-ishq kii hai.n
vo saa.Ns ukha.Dii hu_ii paa.Nv Dag_magaaye hue

na rah_zano.n se ruke raaste mohabbat ke
vo kaafile nazar aaye luTe luTaaye hue

ab is ke baad mujhe kuchh Khabar nahii.n un kii
Gam aashanaa hue apane hue paraaye hue

ye iztiraab saa kyaa hai ki muddate.n guzarii
tujhe bhulaaye hue terii yaad aaye hue

---------- Post added at 12:20 AM ---------- Previous post was at 12:19 AM ----------

raat aadhii se ziyaadaa ga_ii thii saaraa aalam sotaa thaa
Firaq Gorakhpuri

raat aadhii se ziyaadaa ga_ii thii saaraa aalam sotaa thaa
naam teraa le le kar ko_ii dard kaa maaraa rotaa thaa

chaaraagaro ye taskii.n kaisii mai.n bhii huu.N is duniyaa me.n
un ko aisaa dard kab uThaa jin ko bachanaa hotaa thaa

[chaaraagaro=physicians/healers; taskii.n=consolation]

kuchh kaa kuchh kah jaataa thaa mai.n furqat kii betaabii me.n
sunane vaale ha.Ns pa.Date the hosh mujhe tab aataa thaa

[furqat=separation/parting]

taare aksar Duub chale the, raat ke rone vaalo.n ko
aane lagii thii nii.nd sii kuchh, duniyaa me.n saveraa hotaa thaa

tark-e-muhabbat karane vaalo kaun aisaa jag jiit liyaa
ishq ke pahale ke din socho kaun ba.Daa sukh hotaa thaa

[tark-e-muhabbat=abandonment of love]

us ke aa.Nsuu kis ne dekhe us kii aahe.n kis ne sunii.n
chaman chaman thaa husn bhii lekin dariyaa dariyaa rotaa thaa

pichhalaa pahar thaa hijr kii shab kaa, jaagataa rab sotaa i.nsaan
taaro.n kii chhaao.n me.n ko_ii "Firaq" saa motii pirotaa thaa

[pichhalaa=last; hijr kii shab=night of parting]
[rab=God; pironaa=to thread]

---------- Post added at 12:20 AM ---------- Previous post was at 12:20 AM ----------

raat bhii niind bhii kahaanii bhii
Firaq Gorakhpuri

raat bhii niind bhii kahaanii bhii
haaye kyaa chiiz hai javaanii bhii

ek paiGaam-e-zi.ndaganii bhii
aashiqii marg-e-naagahaanii bhii

[paiGaam=message; marg-e-naagahaanii - sudden death]

is adaa kaa terii javaab nahii.n
meharabanii bhii saragaraanii bhii

[saragaraanii=anger]

dil ko apane bhii Gam the duniyaa me.n
kuchh balaaye.N thii aasmaanii bhii

ma.nsab-e-dil Khushii luTaataa hai
Gam-e-pi.nhaa.N bhii paasabaanii bhii

[ma.nsab=stature]

dil ko sholo.n se karatii hai sairaab
zi.ndagii aag bhii hai paanii bhii

[sairaab=to water/irrigate]

shaad-kaamo.n ko ye nahii.n taufiiq
dil-e-Gamagii.n kii shaadamaanii bhii

[shaad-kaamo.n=fortunate people; taufiiq=capability]
[Gamagii.n=immersed in sorrow; shaadamaanii=joy]

laakh husn-e-yaqii.n se ba.Dakar hai
in nigaaho.n kii badagumaanii bhii

ta.nganaa-e-dil-e-malaal me.n hai
behr-e-hastii kii bekaraanii bhii

[ta.nganaa-e-dil-e-malaal=within the limited space of a sad heart]
[behr-e-hastii=ocean of life; bekaraanii=unbounded/limitless]

ishq-e-naakaam kii hai parachhaa_ii
shaadamaanii bhii kaamaraanii bhii

[ishq-e-naakaam=failed love/unrequited love]
[shaadamaanii=happiness; kaamaraanii=success]

dekh dil ke nigaar-Khaane me.n
zaKhm-e-pi.nhaa.N kii hai nishaanii bhii

[nigaar-Khaanaa=studio (art)/also a place where many beautiful girls collect]
[zaKhm=wound; pi.nhaa.N=hidden/buried]

Khalq kyaa-kyaa mujhe nahii.n kahatii
kuchh sunuu.N mai.n terii zabaanii bhii

[Khalq=world]

aaye taariiKh-e-ishq me.n sau baar
maut ke daur-daramiyaanii bhii

[taariiKh-e-ishq=history of love; daur=age/era]
[darmiyaanii=in between]

apanii maasuumiyo.n ke parde me.n
ho ga_ii vo nazar sayaanii bhii

[maasuumiyaa.N=innocence; sayaanii=grown up]

din ko suuraj-mukhii hai vo naugul
raat ko vo hai raat-raanii bhii

[suuraj-mukhii=sunflower; naugul=new flower]
[raat-raanii=a flower known for its heady fragrance]

dil-e-badanaam tere baare me.n
log kahate hai.n ik kahaanii bhii

nazm karate ko_ii na_ii duniyaa
ki ye duniyaa hu_ii puraanii bhii

[nazm=reconstruct/build again]

dil ko aadaab-e-ba.ndagii bhii na aaye
kar gaye log hukmaraanii bhii

[aadaab-e-ba.ndagii=ways of servitude]

jaur-e-kam-kam kaa shukriyaa bas hai
aap kii itanii meharabaanii bhii

[jaur=oppression]

dil me.n ik huuk bhii uThe ai dost
yaad aa_ii terii javaanii bhii

sar se paa tak sapurdagii kii adaa
ek andaaz-e-turkamaanii bhii

[paa=feet; sapurdagii=to give in; turkamaanii=rebellious]

paas rahanaa kisii kaa raat kii raat
mehamaanii bhii mezabaanii bhii

[mezabaan=host]

jo na aks-e-jabiin-e-naaz ki hai
dil me.n ik nuur-e-kahakashaanii bhii

[aks-e-jabiin-e-naaz=image of one's beloved's forehead]
[nuur=light; kahakashaa.N=Milky Way]

zindagii ain diid-e-yaar "Firaq"
zindagii hijr kii kahaanii bhii

[ain=in reality; (ain has many meanings, this is one)]
[diid-e-yaar=a look at one's beloved; hijr=separation]

 

[pkpatriotic]

aadamii aadamii se milataa hai

aadamii aadamii se milataa hai
dil magar kam kisii se milataa hai

bhuul jaataa huu.N mai.n sitam us ke
vo kuchh is saadagii se milataa hai

aaj kyaa baat hai ke phuulo.n kaa
rang terii ha.Nsii se milataa hai

mil ke bhii jo kabhii nahii.n milataa
TuuT kar dil usii se milataa hai

kaar-o-baar-e-jahaa.N sa.Nvarate hai.n
hosh jab beKhudii se milataa hai

Jigar Moradabadi

 

[pkpatriotic]

haa.N kis ko hai mayassar ye kaam kar guzaranaa
Jigar Moradabadi

haa.N kis ko hai mayassar ye kaam kar guzaranaa
ik baa.Nkpan se jiinaa ik baa.Nkpan se maranaa
[mayassar = available; baa.Nkpan = jauntiness]

dariyaa kii zindagii par sadqe hazaar jaane
mujh ko nahii.n gavaaraa saahil kii maut maranaa

saahil ke lab se puuchho dariyaa ke dil se puuchho
ik mauj-e-tah-nashii.n kaa muddat ke baad ubharanaa

[mauj-e-tah-nashii.n = wave that was sitting at the bottom]

jo ziist ko na samajhe jo maut ko na jaane
jiinaa unhii.n kaa jiinaa maranaa unhii.n kaa maranaa
[ziist = life]

 

[PAKIFALCON]

I just hope its not been posted already I love this poetry very much

Meri Dastaan-e-hasarat Vo Suna Suna Ke Rooye
Mere Azmaane Vale Mujhe Azmaa Ke Rooye
Koi Aisa Ahal-e-dil Ho Ke Fasanaa-e-muhabbat
Main Use Suna Ke Roun Woh Mujhe Suna Ke Rooye
Meri Arzoo Ki Duniyaa Dil-e-naatavaan Ki Hasrat
Jise Kho Ke Shaadamaan The Use Aj Paa Ke Rooye
Teri Bewafaiyoun Per Teri Kajadaaiyon Per
Khabhi Sir Jhuka Ke Rooye Khabhi Moun Chupa Ke Rooye
Jo Sunai Anjuman Mein Shab-e-gam Ki Ap Beeti
Koi Ro Ke Muskuraye Koi Muskura Ke Rooye
-------------------------------------------------------------------------------
Maine Is Toor Se Chaha Tujhe Akser Jaana
Jaise Mehtaab Ko Beant Samandar Chahe. ( Best Of The Best ).

 

[Zizou]

Thank you "ajtr" for all the Firaq Gorakhpuri posts ... such a relief ... too bad gems like that are very rare in modern day's poetry ....

 

[Zizou]

Duniya ki mehfilon se uktaa gya hoon ya Rabb
Kya lutf anjuman ka, jab dil hi bujh gya ho?

Shorish say bhaagta hoon, dil DhoonDta hai mera
Aisa sakoot jis par taqdeer bhi fidaa ho

Marta hoon khamoshi par, yeh aarzoo hai meri
daaman mein koh ke, ik choTaa saa jhonpRa ho

Azaad fikr se hoon, uzlat mein din guzaaroon
dunya ke gham ka dil se kaanTa nikal gya ho

lazzat sarod ki ho chiRiyon ke chehchehon mein
chashme ki shorish mein baaja saa baj raha ho

gul ki kali chiTak kar paighaam day kissi ka
saaghar zara saa goya, mujhko jahaan-numa ho

ho haath ka sarhana, sabza ka ho bachoona!
sharmaaye jis se jalwat, khlawat mein woh ada ho

maanoos is qadr ho soorat se meri bulbul
nannhay se dil mein us kay khaTka na kuchh m'ra ho

Saf baandhay donoN jaanib booTay haray haray hoN
nadi ka saaf paani tasveer lay raha ho

ho dilfareb aisa kohisaar ka nazaara
paani bhi mawj ban kar uTh uTh kay dekhta ho

Aaghosh mein zameen ki soya huwa ho sabza
phir phir kay jhaRiyon mein paani chamak raha ho

paani ko choo rehi ho jhuk jhuk ke gul ki Tehni
jaisay haseen koi aa'ina dekhta ho

mehndi lagaaye sooraj jab shaam ki dulhan ko
surkhi liye sunehri har phool ki qabaa ho

raaton ko jalne waalay reh jaain thak kay jis dum
Umeed unki mera TooTa huwa diya ho

bijlee chamak kay unko kaTiya m'ri dikhaa de
jab aasmaan pe har soo baadal ghara huwa ho

pichle pehr ki koy'al, woh subaH ki muazzin
main uska hum-navaa hoon, woh meri hum-nava ho

kaanoN pe ho na mere dair o haram ka ihsaan!
rozan hi jhoNpRee ka, mujhko sehr-numa ho

phooloN ko aaye jis dam shabnam wuzu karne
rona mera wuzu ho, naala meri dua ho!

Is kham'shi mein jaain itne buland naalay
taaron kay qaafilay ko meri sadaa dara ho

Har dard mand dil ko rona mera rulaa day
bayhosh jo paRay hain shaayad inhein jagaa day!

 

[Zizou]

tujhey kho kar bhi tujhay paoon jahaan tuk daikhoon
husan e yazdaan say tujhay husan e butaan tuk daikhoon

tu nay youn daikha hai jaisay kabhi daikha he na tha
mein tu dil mein tairay qadmoon kay nishaan tuk daikhoon

sirf iss shouq mein poochee hein hazaroon battein
mein taira husan tairay husan e bayaan tuk daikhoon

waqat nay zehen mein dhundla diyeah tairay khad o khaal
youn tu mein toot’tay taroon ka dhuwaan tuk daikhoon

dil gaya tha tu yeh ankhain bhi koi lay jata
mein faqat aik he tasveer kahaan tuk daikhoon

ik haqeeqat sahi firdoos mein hooroon ka wajood
husan e insaan sey nimat loon tu wahaan tuk daikhoon

 

[Zizou]

Kitni dil-kash hai khamoshi uski
Har baat be-matlab ho jaisey

One of my fv8 ...

 

[Zizou]

Har koi dil ki hatheli pe hai sehra rakhey
Kis ko sairaab karey aur kise pyasa rakhey

Umr bhar kon nibhata hai taaluq itna
Ae meri jaan ke dushman tujhe ALLAH rakhey

Humko acha nahi lagta koi humnaam tera
Koi tujhsa ho to phir naam bhi tujhsa rakhey

Dil bhi pagal hai ke us shakhs se wabasta hai
Jo kisi aur ka hone de na apna rakhey

Kam nahi tama-e-ibadat bhi to hirs-e-zar se
faqr to woh hai ke jo deen na duniya rakhey

Hans na itna bhi faqeeron ke akele pan per
Jaa, Khuda meri tarah tujhko bhi tanha rakhey

Yeh qanaa-at hai, itaa-at hai ke chahat hai 'faraz'
Hum to raazi hain woh jis haal mein jaisa rakhey !!

 

[Zizou]

Baat nikle gi to phir dur talak jaye gi
log be wajha udasi ka sabab poochain gay

ye bhi poochain gay ke tum itne pareshan kiyon ho
ungliyan uthain gi sookhay huway baloon ki taraf
ik nazar daikhain gay guzray huay saalon ki taraf
chudion per bhi kai tanz kiye jaen gay
kanptay hathon pe bhi fiqray kasay jaen gay
Log zalim hain har ik baat ka ta'ana dain gay
baton baton main mera zikr bhi lay aain gay
unki baton ka zara sa bhi asar mat laina
warna chehray kay ta'usar say samjh jain gay

chahay kuch bhi ho sawalat na karna un say
meray baray main koi baat na karna un say

BAAT NIKAY GI TO PHIR DUUR TALAK JAYE GI

---------- Post added at 06:52 PM ---------- Previous post was at 06:51 PM ----------

Koi yeh kaisay bataye ke wo tanha kiyon hai
wo jo apna tha, wohi aur kisi ka kiyon hai
yahi dunya hai to aisi ye dunya kiyon hai
yahi hota hai to aakhir yahi hota kiyon hai

ik zara haath badha dain to pakad lain daman
us kay seenay main sama jaye na hamari dadhkan
itni qurbat hai to phir faasla itna kyon hai
Koi yeh kaisay bataye ke wo tanha kiyon hai

Dil-e-barbad se nikla nahin ab tak koi
ik lutay ghar pe diya karta hai dastak koi
aas jo toot gai phir say bandhata kiyon hai
Koi yeh kaisay bataye ke wo tanha kiyon hai

tum mussarat ka kaho isko ya gham ka rishta
kehtay hain pyar ka rishta hai janam ka rishta
hai janam ka jo ye rishta to badalta kiyon hai
Koi yeh kaisay bataye ke wo tanha kiyon hai

---------- Post added at 06:53 PM ---------- Previous post was at 06:52 PM ----------

phir usii raah_guzar par shaayad

ham kabhii mil sake.n magar shaayad


jaan pahachaan se kyaa hogaa
phir bhi ai dost Gaur kar shaayad

muntazir jin ke ham rahe tum ho
mil gaye aur ham_safar shaayad

jo bhii bichha.De hai.n kab mile hai.n 'Faraz'
phir bhii tuu intazaar kar shaayad